Ásgeir Sigurgeirsson skammbyssuskytta er á leiðinni á Ólympíuleikana í London.  Alþjóða Skotíþróttasambandið tilkynnti þetta í dag. Ásgeir fer inn á leikana þar sem Skotíþróttasambandi Íslands er úthlutað kvótaplássi á leikana í Frjálsri skammbyssu karla. En þar sem Ásgeir hefur líka náð ólympíulágmarki í Loftskammbyssu mun hann einnig taka þátt í þeirri grein. Þetta er í fyrsta skipti sem íslenskur skotmaður tekur þátt í skammbyssugreinum á Ólympíuleikum.

Alþjóðlegi Ólympíudagurinn er haldinn hátíðlegur um allan heim 23. júní, ár hvert. Íþrótta- og Ólympíusamband Íslands tók þetta verkefni aðeins lengra í ár og skipulagði í samstarfi við sambands- og samstarfsaðila sína heila viku af íþróttatengdum viðburðum, Ólympíuviku ÍSÍ. Meðal þess sem í boði var í Ólympíuvikunni var strandblak, skylmingar, bogfimi, frjálsar íþróttir, keila, Knattþrautir KSÍ, Sunddagar SSÍ,  Golfdagur GSÍ og margt fleira.

Mörg Frístundaheimili og íþróttafélög tóku virkan þátt og voru með ólympíuþema í sínu starfi alla vikuna, litlu ólympíuleikarnir voru m.a. haldnir á tveimur stöðum í dag þar sem krakkar prófuðu pokahlaup, minigolf, hóplangstökk og margt annað.  Í vikunni heimsóttu ólympíufarar okkar og afreksíþróttafólk fjölmarga staði við góðan orðstýr. Spurningarnar í þessari viku til afreksíþróttafólks okkar hafa verið margar og skemmtilegar. Eiginhandaráritanir hafa verið skrifaðar og myndir teknar.

Við þökkum öllum sem tóku þátt í vikunni með okkur og bendum á að þrátt fyrir að þessari viku sé lokið þá er alltaf hægt að hreyfa sig og hafa gaman saman, hér á heimasíðunni er hægt að nálgast ýmsar þrautir og fróðleik um Ólympíuleikana.

Ólympíuvika ÍSÍ var sannarlega vettvangur til þess að veita krökkum tækifæri að kynnast ólympísku gildunum og kynnast ólympíuförum okkar.

Í dag héldu ólympíufarar okkar Íslendinga áfram að heimsækja sumarnámskeið, þær Hrafnhildur Lúthersdóttir og Eva Hannesdóttir heimsóttu Víkinga í morgun. Þar fengu þær ýmsar spurningar eins og hvor þeirra væri betri í sundi , hvort þær væru vinkonur og hvenær þær byrjuðu að synda. Margar aðrar spurningar frá Víkingskrökkunum dundu á þeim sem þær stöllur svöruðu vel og örugglega.

Í dag fóru einnig krakkar úr Frístundaheimilinu Hlíðaskjóli og hittu Rögnu Ingólfsdóttur badmintonkonu í TBR húsinu. Haukakrakkar spiluðu keilu á færanlegum keilubrautum sem hafa slegið í gegn í ólympíuvikunni, fleiri prófuðu að skylmast hjá Skylmingarfélagi Reykjavíkur og búið er að skrá nokkra krakka sem prófðu skylmingar í gær á næsta námskeið.  Mikil gleði og kátína í allan dag.

Á morgun heldur gleðin áfram og þar má helst nefna að Frístundaheimilið Kampur í Reykjavík ætlar að halda litla ólympíuleika á Klampratúni sem og krakkarnir í Gufunesi í Grafarholti.  Afreksfólkið okkar fer í fleiri heimsóknir, Einar Daði tugþrautarkappi kíkir í Grafarvoginn, Ragnheiður Ragnarsdóttir og Jakob Jóhann Sveinsson fara í Garðabæinn og heilsa þar upp á Stjörnukrakkana.  Nóg um að vera á morgun eins og hina dagana í ólympíuvikunni.

Í kvöld verður Miðnæturhlaupið haldið í 20. sinn í Laugardalnum. Hlaupið hefur fengið nýjar hlaupaleiðir og nýtt nafn og heitir nú Miðnæturhlaup Suzuki. Í boði verða þrjár vegalengdir sem ræstar verða í sitthvoru lagi.

Dagskrá Miðnæturhlaups Suzuki 21. júní:
•21:20 – Hálfmaraþon (21,1 km) ræst – ný vegalengd
•21:20 – Upphitun hefst fyrir framan Skautahöllina í Laugardal
•21:50 – 5 kílómetra hlaup ræst
•22:00 – 10 kílómetra hlaup ræst

Allar upplýsingar um hlaupið er hægt að nálgast á heimasíðu hlaupsins.

Í dag voru margir sem prófuðu margar íþróttagreinar í ólympíuvikunni. Bogfimi í Baldurshaganum, Knattþrautir á Þróttaravellinum, keila, heimsóknir frá Ásdísi Hjálms og Óðni kúluvarpara og ýmislegt annað var í boði. Myndir frá deginum koma hér á síðuna fyrr en síðar. Frábær dagur sem endaði með golfdegi á flestum golfvöllum á landinu þar sem hægt var að slá úr fötu frítt.