Í dag voru margir sem prófuðu margar íþróttagreinar í ólympíuvikunni. Bogfimi í Baldurshaganum, Knattþrautir á Þróttaravellinum, keila, heimsóknir frá Ásdísi Hjálms og Óðni kúluvarpara og ýmislegt annað var í boði. Myndir frá deginum koma hér á síðuna fyrr en síðar. Frábær dagur sem endaði með golfdegi á flestum golfvöllum á landinu þar sem hægt var að slá úr fötu frítt.

Í ólympíuvikunni ætlar Sundsamband Íslands að bjóða upp á Sunddaga SSÍ. Það virkar þannig að allir sem synda í þessari viku geta skráð vegalengdina sem þeir synda í afgreiðslu allra sundstaða á Íslandi. Synt til London er yfirskriftin því til London þar sem Ólympíuleikarnir verða haldnir í sumar eru 1205 sjómílur eða 2.231.660 metrar.  Markmiðið er að Íslendingar syndi þessa vegalend saman og styðji um leið íslenska sundliðið á leiðinni til London.

Sem sé,  þú syndir og skráir vegalengdina í afgreiðslu laugarinnar ásamt nafni og kennitölu. Glaðningur frá SSÍ og Speedo fyrir þá sem synda oftast eða lengst. Sunddagar SSI

Hringirnir fimm sem mynda Ólympíutáknið tákna sameiningu fimm heimsálfa og samfélag íþróttamanna alls staðar að úr heiminum meðan á Ólympíuleikunum stendur. Þeir tákngera alheimshreyfingu Ólympíuhreyfingarinnar.

Hringarnir eru samtengdir og settir fram í formi trapísu. Litir hringanna eru: blár, svartur, rauður, gulur og grænn. Það var Pierre de Coubertin lagði til þetta tákn á Ólympíuþinginu í París árið 1914.  Hringirnir fimm á hvítum grunni mynda Ólympíufánann, sem var afhjúpaður á sama þingi. Fáninn blakti í fyrsta sinn á Ólympíuleikvangi árið 1920 á Antwerpen leikjunum.

Ef fjöldi hringjanna er tákn um heimsálfurnar, þá voru litirnir (sex talsins, að meðtöldum hvíta bakgrunninum) valdir til að tryggja að sérhvert land ætti að minnsta kosti einn af litunum í þjóðfána sínum.

Meðan á leikunum stendur eru hringirnir allsstaðar: þeir birtast á fötum, höttum og töskum (og jafnvel stundum á andlitunum!) á Ólympíu þátttakendum jafnt og almenningi. Í gegnum hringina eru íþróttafólk og áhorfendur sameinuð undir einum og sama fánanum.

Margir hafa gert sér það til gamans að búa til hringina fimm úr fólki – hefur þú prófað það?  Sendu okkur mynd ef það tekst á hjordis@isi.is

Þá er ólympíuvikan hafin og mörg sumarnámskeið eru með okkur í skemmtilegheitunum og fá til sín íþróttaheimsókn eða fara í íþróttaheimsóknir. Við hvetjum alla sem vilja vera með að hafa samband og kanna hvað er í boði. Það er ekki of seint að hoppa með og ein skemmtileg hugmynd er að vera með ólympíudag á lokadegi námskeiðsins nk. föstudag þar sem t.d. er hægt að vera með ólympíuþrautina sem allir geta verið með í.

Ef þú ert með spurningu hafðu samband – hjordis@isi.is eða í síma 5144009.

Þó allir séu á því að skemmtilegast sé að vera úti og hreyfa sig þá er hér  hægt að kíkja á myndband sem er um 16. mínútna langt. Myndbandið er um lukkudýr Ólympíuleikana og þeirra ferð í leit að regnboganum.

Sömu lukkudýr kunna ólympíudansinn sem hægt er að læra.